1 Star2 Stars3 Stars4 Stars5 Stars (No Ratings Yet)
Загрузка...
144 views

Артемий Афанасьев «Хоһооннор» кинигэтин биһирэмэ

Харбалаахтааҕы олохтоох библиотека тэрийиитинэн бэс ыйын 4 күнүгэр Артемий Викторович Афанасьев — Артыамый 2021 сыллаахха тахсыбыт хоһоонун кинигэтин биһирэмэ бэрт тэрээһиннээхтик буолан ааста. Кырдьыга да, ыһыах бүччүм түһүлгэтэ тэриллэн, олус кэрэ, сылаас, чараҥ ортотугар Эбэбит оргууйдук устар көстүүтэ… Дьон-сэргэ бэйэ- бэйэтин саҥалыы, сонургуу көрсүһэн, сүргэтэ көтөҕүлүннэ. Саха Республикатын үтүөлээх учуутала Валентина Семеновна Кривошапкина киһи истэ олоруон курдук, авторбыт хоһооннорун билиһиннэрдэ. «Айаана» түмсүү айар куттаах ийэлэрэ сахалыы таҥнан-симэнэн хоһоон аахпыттара «хоһоон түһүлгэтин» өссө сахалыы тыыннаан биэрдэ. Комсомол кэмин хоһоонноругар холбуу тутан дьоро күммүтүгэр кэскилгэ, сайдыыга ыҥырар Артемий Викторовичка олохтоох дьаһалта, ветеран сэбиэтэ эҕэрдэ туттарар үөрүүлээх түгэнин олохтоох мелодиспыт Виктор Туманов «Тыыннаах диэн үчүгэй даҕаны» ырыатынан ситэрэн, үрдэтэн биэрдэ. Маны сэргэ олохтоох автор «Уһуктуу» хоһоонун «Ыллык» түмсүү бөлөҕө ырыа гынан билиһиннэрдэ, бэйэлэрин анабыл эҕэрдэ хоһооннорун Артемий Викторовичка анаан аахтылар. Автор хоһооннорун ис сурэҕиттэн ылынан бар-дьоҥҥо иһитиннэрэр, тиһигэ суох күннэтэ тарҕатар Вера Дайбаннырова эҕэрдэтэ  үөртэ. Хоһоон тула сэһэргэһии түгэнин автор «Чычымахха бастакы бэкээринэ» диэн хоһоонугар ахтыллар биэкэр Ньукулай сиэн кыыһа, «Таатта күөрэгэйэ» Анна Канаева ырыалара көрөөччүнү, айар куттаах дьоммутун айар турук иэйиитигэр куустарда. Түһүлгэни төгүрүччү тардыллыбыт алаадьылаах остуолларга наҕылыччы олорон, сайыммытын көрсүү, хоһоонунан арчыланыы буолла.

Добавить комментарий

Ваш адрес email не будет опубликован. Обязательные поля помечены *