Сэтинньи 15 күнүгэр 2006 сылга,  Саха республикатын президена В.А. Штыров уураа5ынан сэтинньи ый 25 күнэ- «Олоҥхо» күнүнэн биллэриллибитэ. Олоҥхо- саха норуотун үйэлээх баайа. Саха сиригэр Олоҥхону үйэтэтиигэ, киэҥ араҥаҕа тарҕатар соруктаах үгэс быһыытынан Олоҥхо дэкээдэтэ саҕаламмыта. Олоҥхо дэкээдэтин чэрчитинэн  Республикабытыгар араас научнай конференциялар, төгүрүк остуоллар, айымнньылаах киэһээлэр, күрэхтэр уонна дьыктааннар ыытыллаллар, ордук болҕомто оҕолорго, эдэр ыччакка ууруллар.

Орто Амма нэһилиэгэр Өрөспүүбүлүкэтээҕи Олоҥхо дэкээдэтэ, Харбалаах нэһилиэгин ытык  олохтооҕо, олоҥхону толорооччу — Иван Иванович Слепцов, “Улаан буулуур аттаах Дуулаҕа күүстээх Эрэмэччи бухатыыр” олоҥхото кинигэ буолан тахсыбыт биhирэминэн арыллыбыта. 

“Дабайыы” сиэр-туом түмсүүтэ алгыһынан дэкээдэни арыйбыттара.

Алгыс кэнниттэн, Федорова Ванесса- 3 кылаас үөрэнээччитэ сүрдээх үчүгэйдик, доргуччу олоҥхооттон быһа тардыыны толордо.

Иван Иванович Слепцов, киэн туттар киһибит, бастакы олоҥхото-2021 сыллаахха тахсыбыта. Кэлин тупсаран, тэнитэн, оҕолоругар, сиэннэригэр судургутутан эбэн биэрбитэ. Слепцовтар дьиэ кэргэн олоҥхону толорууга араас күрэхтэргэ кыралыын, улаханныын кыттаннар элбэх ситиһиилээх ыал буолаллар. Иван Иванович “Улаан буулуур аттаах Дуулаҕа күүстээх Эрэмэччи бухатыыр”олоҥхотун 2024 сылга хомуйан, үбүлээн  Харбалаахтааҕы оҕо искусствотын преподавателэ Парфенова Варвара Алексеевна- Арылы Хотун салалталаах, Харбалаахтааҕы “Дорҕоон тойук” олоҥхоhуттар бөлөхтөрө, кини сырдык аатын үйэтитэн бэчээттэппиттэрэ. Иллюстрацияны Чымынаайы орто оскуолатын учуутала — Арылахов Олег Иннокентьевич оҥорбута .

Кинигэ сүрэхтэниитин кэннэ, Харбалаахтааҕы оҕо искусствотын оскуолатын учууталлара, бэйэлэрин үөрэнээччилэрин олус үчүгэйдик бэлэмнээн, такайан Иван Иванович олоҥхотун оҕолор оонньоон көрдөрбүттэрэ.

Көрөөччүлэр  оҕолор оонньууларын астына-дуоһуйа көрбүттэрэ. Испиктээкил кэнниттэн бары сомоҕолоһуу оһуохайыгар , Айаал Никитич Быгынаанов таһаарыытынан оһуохайдаабыттара.

Аҕыйах хоноот Харбалаахтааҕы оҕо искусствотын оскуолатын учууталлара уонна үөрэнээччилэрэ үөрүүлээх солуну   иһитиннэрбиттэрэ, ол курдук Иван Иванович Слепцов «Улаан буулуур аттаах Дуула5а күүстээх Эрэмэччи бухатыыр» олоҥхотун Республика таһымыгар көрдөрөн,   «Путешествие в мир Олоҥхо» Республиканскай фестивальга кыттан , кыайан-хотон элбэх номинацияҕа тиксэн, дьон биһирэбилин ылан кэлбиттэрэ.

Сэтинньи ый 25-30 күннэригэр төрөөбүт тылга, сурукка-бичиккэ аналлаах «Олоҥхо дьыктаана» диэн акцияҕа олохтоох нэһилиэк дьоно-сэргэтэ, тэрилтэлэр, Платон Алексеевич Ойунскай «Дьулуруйар Ньургун Боотур» олонхоттон быhа тардыыны суруйан, кыттыыны ыллылар. Ордук көхтөөхтүк балыыһа уонна о5о уһуйаанын үлэһиттэрэ кыттыыны ыллылар. Барыта 42 киһи кытынна. Дьыктаан 231 тылтан ,59 тыл бэлиэтиттэн турар. Олонхо тыла төһө да уустугун иһин, учугэй көрдөрүүнү көрдөрдүлэр. «Туйгун суруйааччы» ааты ыллылар: Андреева О.М., Григорьева В.В., Егорова У.В., Иннокентьева Т.И., Кулачикова С.Н., Месеева Т.П., Осипова А.И., Рахлеева В.Т.,Суздалова Л.И., Татаринова Л. А., Терякова А.И., Терякова М.С., Федорова И.Р., Халыева С.П., Шестакова А.А..  «Үчүгэй суруксут» анал аатынан, ахтыыбынай позициялаах, сылын аайы буолар дьыктааҥҥа көтүппэккэ кыттар Слепцова М.С. ааттанна.