Петр Васильевич Оготоев,  Таата улууһун Төрүт  нэһилиэгигэр 1910 сыллаахха төрөөбүтэ.  Кини биллэр саха  олоҥхоһута, тойуксута, поэт, прозаик, фольклорист, Саха  АССР оскуолаларын үтүөлээх учуутала, РСФСР норуотун үөрэҕэриитин туйгуна, этнопедагог, музеевед.

      1956 сыллаахха Дьокуускайдааҕы педагогическай институт нуучча тылын уонна литературатын факультетын бүтэрбитэ. Педагогическай үлэтин Уус — Майа улууһугар 1933 сыллаахтан саҕалаабыта. Учууталынан үлэлээбит 44 сылыттан, 24 сылын Лөгөй оскуолатыгар оҕолору үөрэтэргэ — иитэргэ анаабыта. Нуучча тылын үөрэтиигэ лицейскэй ньыманы туһаммыта. Аҕа быһыытынан оҕону иитиигэ үтүө холобур буолар. Кыыһа Клавдия Петровна үтүөлээх учуутал, уолаттара Петр Петрович виртуоз хомусчут, Егор Петрович үтүөлээх скульптор.

     «Эһэ Хара аттаах Элэс Боотур» (эбэтэр көннөрү «Элэс Боотур») диэн олоҥхото үс тылынан 2002 с. бэчээттэнэн тахсыбыта: саха, нуучча, ааҥыл.

      2010 сыллаахха Петр Васильевич Оготоев төрөөбүтэ 100 сылыгар анаан уола Егор Петрович,  Харбалаах бөһүөлэгин уҥуор  өттүгэр памятник оҥорон туруорбута. Билигин ол памятнигы 11 кылаас оҕолоро шефстволаан, көрө- харайа сылдьаллар.

     Кулун тутар 1 күнүгэр, олоҥхоһуттар түмсүүлэрэ тэрийбит  «Олоҥхо алыптаах эйгэтигэр » тэрээһиҥҥэ,  Петр Васильевич Оготоеву санаан-ахтан  аастыбыт, олохтоох библиотека выставка туруорда, Тэрээһин  түмүктэнэр чааһыгар , Айаал Никитич Быгынаанов таһаарыытынан бары бииргэ, илии тутуһан оһуохайдаатыбыт.